"Камунальныя паслугі аплачвае своечасова". Хто будзе лічыць галасы на выбарах прэзідэнта?
У Беларусі распачаўся важны этап выбарчай кампаніі – фарміраванне ўчастковых выбаркамаў. Менавіта чальцы гэтых камісіяў будуць лічыць галасы беларусаў на прэзідэнцкіх выбарах. Назіральнік кампаніі «Праваабаронцы за свабодныя выбары» Аляксей Лойка ажыццяўляў маніторынг за фарміраваннем 122 УВК у Мінску. У адміністрацыі Фрунзенскага раёна Мінска ўчастковыя выбаркамы фарміруюць два дні, бо гэты раён – самы вялікі ў горадзе па колькасці насельніцтва (па афіцыйных дадзеных там пражывае 470 тысяч жыхароў). Каго ўключаюць у склады ўчастковых камісій, якая іх рэпрэзентатыўнасць, якія патрабаванні выстаўляюцца да членаў УВК – чытайце ў нашым матэрыяле.
У якой форме праходзіць паседжанне?
Паседжанне транслюецца на пляцоўцы YouTube. Такое рашэнне было прынята "з улікам эпідэміялагічнай сітуацыі". Пры гэтым першапачаткова з дзевяці членаў адміністрацыі, якія складаюць кворум, толькі двое былі ў масках, пазней і тыя іх знялі. Як адзначае Аляксей Лойка, з самага пачатку паседжання ніводзін з прысутных чальцоў адміністрацыі не прадставіўся, а твары паловы з прысутных наогул не бачныя. Таму адразу ўзнікаюць сумненні наконт адкрытасці і галоснасці дадзенага паседжання.
Хто вылучаецца ў камісіі?
Наогул у Беларусі ва ўчастковыя выбарчыя камісіі вылучана 70 190 чалавек. Больш за ўсё чалавек вылучылася ад грамадскіх аб'яднанняў.
![]()
Лічыць галасы на выбарах захацелі больш за 70 тысяч беларусаў
Пры фарміраванні 122 участковых выбаркамаў сітуацыя па вылучэнні членаў выглядае гэтак жа, як агульная па Беларусі:
- 27% – палітычныя партыі;
- 47% – грамадскія аб'яднанні;
- 23,5%– грамадзяне;
- 2,5% – працоўныя калектывы.
Якія патрабаванні выстаўляюцца да кандыдатуры члена УВК?
Назіральнік кампаніі Аляксей Лойка распавядае, што ў пачатку паседжання былі агучаны патрабаванні да членаў УВК. На думку членаў адміністрацыі, УВК – гэта часовы працоўны калектыў, таму для кандыдатаў у УВК неабходныя наступныя патрабаванні:
- вопыт грамадскай дзейнасці;
- арганізацыйныя здольнасці;
- уменне працаваць з людзьмі;
- пазбяганне канфліктных сітуацый.
Таксама былі агучаны прычыны, па якіх грамадзянам адмаўляюць у вылучэнні ў склад УВК: недакладны адрас жыхароў, якія вылучаюць свайго прадстаўніка ў склад УВК; няпоўныя дадзеныя; дакументы не адпавядаюць нумару УВК; подпісы грамадзян не аформленыя ў храналагічным парадку; адна і тая жа група вылучыла розныя асобы; у падтрымку асобы, якая вылучаецца ў склад УВК, падпісалася менш за 10 чалавек.
Як адзначае Аляксей Лойка, ужо традыцыйна ў Фрунзенскім раёне ў склад УВК сваіх прадстаўнікоў вылучылі: Беларускі саюз жанчын, Беларуская сацыяльна-спартыўная партыя, БРСМ, Белая Русь, Беларуская аграрная партыя, Беларускае таварыства Чырвонага Крыжа, Беларускі Фонд міру, Камуністычная партыя, Рэспубліканская партыя працы і справядлівасці, Беларуская асацыяцыя шматдзетных бацькоў.
Некалькі працоўных калектываў вылучылі сваіх прадстаўнікоў: траўматалагічнае аддзяленне паліклінікі №2, жыллёва-эксплуатацыйны ўчастак №1, камунальнае прадпрыемства Эксплутацыйнае аб'яднанне №2, Аддзел маркетынгу прадпрыемства "Светапрыбор", Рэмаўтадор.
Пры гэтым прадстаўнікам палітычных партыяў і грамадзянаў, якія вылучаліся шляхам збору подпісаў, было адмоўлена ва ўключэнні ў УВК.
"Першы дзень фарміравання учасковой камісіі паказвае, што ва УВК не знайшлося месца для прадстаўнікоў БСДП «Грамада», БНФ «Адраджэньне», Аб'яднанай грамадзянскай партыі, а таксама вылучаных ад грамадзян асобам, якія, на думку членаў адміністрацыі, не далі звестак аб досведзе працы ва ўчастковых выбарчых камісіях. Паўстае рытарычнае пытанне, а адкуль у людзей, якіх вылучылі грамадзяне, будзе досвед працы ва ўчастковай камісіі пры такім жорсткім адборы?" – каментуе сітуацыю Аляксей Лойка.
Дык якія людзі ў выніку будуць лічыць галасы на выбарах?
Назіральнік кампаніі "Праваабаронцы за свабодныя выбары" Аляксей Лойка прыводзіць вытрымкі з характарыстык, якія гучалі на паседжанні ў дачыненні да людзей, уключаных у склад 122 участковых камісій у Фрунзенскім раёне Мінска:
- "камунальныя паслугі аплачвае своечасова, да крымінальнай адказнасці не прыцягвалася";
- "заўсёды ўважліва ўнікае ў праблемы жанчын";
- "з'яўляецца актыўным удзельнікам палітычных працэсаў, якія адбываюцца ў нашай краіне";
- "сістэматычна працуе над сабой, мае ўстойлівую жыццёвую пазіцыю";
- "з'яўляецца ветэранам выбарчай сістэмы, перадае вопыт маладым";
- "вядзе здаровы лад жыцця";
- "адрозніваецца спартыўнай выпраўкай";
- "мае дастатковы палітычны кругагляд";
- "вядзе вялікую тлумачальную працу па выкананні выбарчага заканадаўства";
- "удасканальвае веды выбарчага заканадаўства";
- "валодае трывалымі ведамі Выбарчага заканадаўства";
- "сочыць за зменамі выбарчага заканадаўства";
- "пастаянна вывучае выбарчае заканадаўства";
- "Маріванна валодае агульнай эрудыцыяй";
- "цалкам прытрымліваецца карпаратыўных нормаў і правілаў";
- "у экстрэмальных сітуацыях праяўляе самаадданасць";
- "мае шырокія пазнання выбарчага заканадаўства";
- "мае ўпэўненыя жыццёвыя арыенціры, палітычна адукавана і кампетэнтна";
- "паважліва ставіцца да дзяржаўнай палітыкі";
- "упэўнена арыентуецца ў выбарчым заканадаўстве";
- "ведае тэрыторыю выбарчага ўчастка".