Агітацыйныя пікеты ў Магілёве: супрацьстаянне каманды Ціханоўскай і каманды Лукашэнкі
Першы пікет у падтрымку кандыдата ў прэзідэнты Святланы Ціханоўскай адбыўся ў Магілёве 18 ліпеня. На працягу чатырох гадзін людзі падыходзілі на пляцоўку перад Лядовым палацам. Пра гэта піша mspring.online.
- Ілюстрацыя з сайта mspring.online
Гэта не самае выгаднае месца для агітацыі. Усяго раённыя выбаркамы Магілёва абмежаваліся двума пляцоўкамі для кандыдатаў і іх штабоў. Акрамя Лядовага палаца, вылучэнцам прапануецца агітаваць яшчэ побач са спартыўным комплексам «Алімпіец». Тыя, хто жыве ў Магілёве, ведаюць, што гэтыя пляцоўкі, мякка кажучы, масавымі не з’яўляюцца.
Нягледзячы на гэта, за чатыры гадзіны на пікеце ў падтрымку Ціханоўскай пабывала, па падліках праваабаронцаў, каля 500-600 чалавек.
Сама Ціханоўская прыехаць на пікет не змагла. Замест яе "рулілі" давераныя асобы з Магілёва – сябры АГП Уладзімір Шанцаў і Таццяна Сівачэнка.
Пасля кароткага прывітання, Шанцаў і Сівачэнка прапанавалі магілёўцам выказацца ў адкрыты мікрафон. Усе выступоўцы заявілі пра незадаволенасць дзеючай уладай. Акрамя выступленняў магілёўцаў, была музычная праграма.
Людзей на мітынгу падтрымлівалі аўтамабілісты – яны сігналілі, калі праязджалі міма. Тых, хто падаваў гукавы сігнал, пазней спынялі супрацоўнікі ДАІ, якія дзяжурылі па ўсіх напрамках ад пікету.
На наступны дзень пасля пікета Ціханоўскай у цэнтры Магілёва прайшла "Моладзевая праграма #раЗАм". "Свята жыцця" арганізаваў БРСМ. За некалькі дзён да гэтага, арганізацыя абвясціла аб падтрымцы кандыдата і дзеючага прэзідэнта Аляксандра Лукашэнкі.
Праўладная моладзь зладзіла канцэрт у самым масавым месцы горада – побач з ГЦ "Атрыум". Раней на гэтым месцы выстройваліся ў “Ланцуг салідарнасці” і мірна пратэставалі супраць дзеючай улады прыхільнікі Ціханоўскай, Бабарыкі і Цапкалы. Зараз "апазіцыю" з цэнтра выгналі.
Напачатку, канцэрт БРСМ масавай акцыяй не быў. Толькі калі з аўтобуса выгрузілі некалькі дзясяткаў БРСМаўцаў у сініх майках са сцягамі, атрымалася адносна дастойная карцінка. Гэтыя хлопцы – удзельнікі "моладзевага цягніка #БеларусьМоладзьНатхненне". Яны будуць курсіраваць па ўсёй Беларусі.
Цвіком праграмы стаў выступ рэспубліканскага старшыні ГА БРСМ Зміцера Варанюка. Неверагоднае супадзенне, што Варанюк адначасова з’яўляецца і даверанай асобай Аляксандра Лукашэнкі на выбарах-2020.
Прамой агітацыі за Лукашэнку не было. Замест гэтага лідэр БРСМ заклікаў быць "за Беларусь". Гэты наратыў выкарыстоўваецца прыхільнікамі Лукашэнкі, паколькі менавіта Аляксандр Рыгоравіч, на іх думку, з’яўляецца гарантам спакою і шчасця ў нашай краіне. Мяркуючы па ўсім, штаб дзеючага прэзідэнта сам нават не збіраецца выкарыстоўваць тыя месцы для законнай агітацыі, якія ўлады выдзелілі апанентам Лукашэнкі.