МЗС – праваабаронцам: Беларускі бок гатовы запрасіць міжнародных назіральнікаў
Яшчэ напачатку чэрвеня Старшыня РПГА “Беларускі Хельсінкскі камітэт” Алег Гулак накіраваў зварот у Міністэрства замежных спраў Рэспублікі Беларусь, у якім прасіў праінфармаваць аб захадах дзяржавы па запрашэнні міжнародных назіральнікаў, у тым ліку місіі БДІПЧ АБСЕ, на час правядзення выбараў Прэзідэнта Рэспублікі Беларусь.
У адказе за подпісам намесніка Міністра замежных спраў Рэспублікі Беларусь Алега Краўчанкі паведамляецца, што пытанне аб накіраванні запрашэнняў у адрас міжнародных арганізацый да назірання за прызначанымі на 9 жніўня 2020 года выбарамі Прэзідэнта Рэспублікі Беларусь знаходзіцца на разглядзе.
“10 чэрвеня 2020 г. старшыня ЦВК Лідзія Ярмошына пацвердзіла, што беларускі бок гатовы запрасіць міжнародных назіральнікаў, уключаючы місіі БДІПЧ АБСЕ і СНД, па меры паляпшэння эпідэміялагічнай абстаноўкі, як мяркуецца, - пасля рэгістрацыі кандыдатаў у прэзідэнты”, - паведамляецца ў адказе.
Таксама МЗС адказаў праваабаронцам, што ведамства “ў рамках кампетэнцыі будзе гатова стварыць усе неабходныя ўмовы для працы міжнародных наглядальных місій у нашай краіне”.
Дарэчы, аб тэлефоннай размове намесніка міністра замежных спраў Беларусі Алега Краўчанкі з дырэктарам БДІПЧ АБСЕ Інгіб'ерг Сальрун Гісладатыр 24 чэрвеня паведаміў сайт МЗС. У кароткай інфармацыі гаворыцца толькі пра тое, што суразмоўцы абмеркавалі пытанні, звязаныя з арганізацыяй міжнароднага назірання па лініі БДІПЧ за бягучай прэзідэнцкай кампаніяй у Беларусі.
Па інфармацыі праваабаронцаў, у цяперашні час такога запрашэння для місіі БДІПЧ АБСЕ не было, хаця ў мінулыя электаральныя кампаніі запрашэнні дасылаліся значна раней.
Прадстаўнікі кампаніі "Праваабаронцы за свабодныя выбары" лічаць удзел міжнародных назіральнікаў надзвычай важным і спадзяюцца, што ўлады Беларусі неадкладна накіруюць адпаведныя запрашэнні міжнародным місіям, у тым ліку місіі БДІПЧ АБСЕ.