Эксперты ААН патрабуюць спыніць рэпрэсіі супраць пратэстоўцаў у Беларусі перад выбарамі
Эксперты ААН 1 ліпеня запатрабавалі, каб Беларусь устрымалася ад гвалту супраць мірных дэманстрантаў напярэдадні прэзідэнцкіх выбараў 9 жніўня. Яны заклікалі ўрад адмовіцца ад палітыкі адвольных арыштаў, гвалту і запалохвання ў дачыненні да актывістаў грамадзянскай супольнасці.
Спецыяльны дакладчык па пытанні аб становішчы ў галіне правоў чалавека ў Беларусі Анаіс Марэн, Спецыяльны дакладчык па пытанні аб правах на свабоду мірных сходаў і асацыяцыі Клеман Вуль, Спецыяльны дакладчык па пытанні аб становішчы праваабаронцаў Мэры Лолар, Спецыяльны дакладчык па пытанні аб заахвочванні і абароне права на свабоду меркаванняў і іх свабоднае выказванне Дэвід Кайе і Спецыяльны дакладчык па пытанні аб незалежнасці суддзяў і адвакатаў Дыега Гарсія-Саян заявілі, што толькі з 18 чэрвеня не менш за 200 палітычных актывістаў, праваабаронцаў, журналістаў, блогераў і іншых прадстаўнікоў грамадзянскай супольнасці былі арыштаваныя падчас мірных дэманстрацый па ўсёй краіне. Пратэсты былі накіраваныя на тое, каб прадэманстраваць салідарнасць з амаль 500 іншымі актывістамі, затрыманымі з пачатку траўня, калі яны рэалізоўвалі сваё права даваць і збіраць подпісы для вылучэння кандыдатаў у прэзідэнты.
"Мы рашуча асуджаем правадзімую палітыку урадам масавых арыштаў прадстаўнікоў грамадзянскай супольнасці, якія мірна рэалізоўваюць свае правы", - заявілі эксперты.
"Мы рэзка асуджаем палітыку і дзеянні, якія абмяжоўваюць права беларусаў на свабоду мірных сходаў і свабоду меркаванняў і іх выказвання".
Апошнія пратэсты адбыліся пасля арышту 18 чэрвеня галоўнага апазіцыйнага кандыдата краіны Віктара Бабарыка, які знаходзіцца пад следствам паводле абвінавачвання ў фінансавых злачынствах.
Экспертам паведамілі, што невядомыя людзі ў цывільным пачалі адвольна арыштоўваць журналістаў і мінакоў у некалькіх гарадах Беларусі, у той час як супрацоўнікі спецыяльнага падраздзялення міліцыі па барацьбе з беспарадкамі ўжывалі празмерную сілу супраць мірных дэманстрантаў. Многія з затрыманых былі збітыя, запалоханыя, з імі жорстка абыходзіліся, альбо яны былі аштрафаваныя ці падвергнутыя адміністрацыйнаму арышту тэрмінам да 15 дзён па абвінавачванні ў парушэнні працэдуры правядзення масавых мерапрыемстваў.
"Мы занепакоеныя тым, што падыход урада да мірных пратэстоўцаў і журналістаў, якія спрабуюць выканаць сваю працу, становіцца ўсё больш гвалтоўным і абразлівым. Мы хацелі б зноў паўтарыць, што абмежаванні правоў чалавека, і асабліва грамадзянскіх і палітычных правоў, асабліва сур'ёзныя, калі гэта здзяйсняецца напярэдадні выбараў", - сказалі эксперты.
"Напярэдадні выбарчай кампаніі мы заклікаем урад неадкладна спыніць пераслед мірных дэманстрантаў і іншых прадстаўнікоў грамадзянскай супольнасці, уключаючы журналістаў і блогераў".
"Плюралістычнае асяроддзе, у якім усе людзі могуць бяспечна і свабодна ажыццяўляць як сваё права шукаць і распаўсюджваць інфармацыю, так і правы на свабоду выказвання меркаванняў, мірных сходаў і асацыяцый неабходнае для забеспячэння цэласнасці бягучага выбарчага працэсу і легітымнасці яго выніку", - заявілі эксперты.