У Астраўцы альтэрнатыўныя прадстаўнікі ў выбарчыя камісіі не ўключаны
23 чэрвеня на зачыненым з прычыны пандэміі пасяджэнні Астравецкага райвыканкама сфармаваны склад участковых камісій раёна па выбарах прэзідэнта. Альтэрнатыўныя кандыдатуры вызначаным яшчэ на стадыі падрыхтоўкі праекта рашэння ў склад камісіі не уключаны.
- Галасаванне супраць уключэння у склад Варнянскай участковай камісіі №8 кандыдатуры кіраўніка абласной арганізацыі АГП Міколы Уласевіча.
Так, ад Аб’яднанай грамадзянскай партыі ў камісіі вылучалася 6 чалавек. Асобу аднаго яе прадстаўніка (жанчына) нават не выносілі на галасаванне, бо яшчэ да пасяджэння выканкама ў працэсе ацэнкі дакументаў было заўважана, што яна пабралася шлюбам і змяніла прозвішча. Гэта расцэнена як парушэнне выбарчага заканадаўства. Прагучала таксама яшчэ адна перашкода для ўключэння яе ў склад камісіі: жанчына неўзабаве чакае дзіця. Таксама па фармальных прычынах не выносілася на галасаванне кандыдатура ад абласной структуры РДАГА “Гавары праўду”, бо ў пратаколе аб вылучэнні не пазначаны юрыдычны адрас і тэлефон гэтага органа.
Заўважана, што нават пры наяўнасці альтэрнатыўных кандыдатур іх характарыстыкі не параўноўваліся з астатнімі, што яскрава сведчыць пра адсутнасць выразных крытэраў адбору ў склад камісіі.
Для грамадскасці на сайце выканкама быў выстаўлены відэазапіс пасяджэння. Пры гэтым для запісу быў абраны такі ракурс, што можна было спраўдзіць асобы толькі двух з сямі сябраў выканкама. І не заўсёды было бачна, як яны галасавалі.