Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

Як прымушаюць галасаваць датэрмінова? Падборка фактаў з розных гарадоў краіны

Датэрміновае галасаванне традыцыйна не абыходзіцца без прымусу ўдзельнічаць у ім работнікаў дзяржаўных прадпрыемстваў і ўстаноў, вайскоўцаў і студэнтаў. Кампанія "Праваабаронцы за свабодныя выбары" збірае выпадкі і паведамленні пра "загоны" са ўсёй краіны.

Мінск

Кампаніі “Праваабаронцы за свабодныя выбары” паведамляюць, што курсантам Ваеннай акадэміі ў Мінску не дазваляюць галасаваць у асноўны дзень галасавання (9 жніўня). Ім паведамілі, што ўсе строем ідуць галасаваць у той дзень, у які ім скажуць.

Дырэктар Рэспубліканскага цэнтру алімпійскай падрыхтоўкі па водналыжным спорце Сяргей Марчанка паведаміў сваім падначаленым, што іх будуць вазіць на датэрміновае галааванне 4 і 5 жніўня ў працоўны час. Са слоў дырэктара РЦАП, гэта ўказанне Міністэства спорта і турызма.

Жодзіна

На ААТ “РЕМИЗ” складался спісы людзей для галасавання датэрмінова і ў дзень выбараў 9 жніўня. Дырэктар Павел Насевіч паведаміў работнікам пра неабходнасць справаздачыцца перад ім наконт таго, хто і калі прагаласаваў. Насевічу, па яго словах, у сваю чаргу трэба справаздачыцца ў гарадскі выканкам.

Крупкі

Дырэкатар сярэдняй школы №3 Алена Баранчук дала ўказанні ўсім супрацоўнікам школы галасаваць датэрмінова.

Дзяржынск

Кіраўніцтва агракамбіната “Дзяржынскі” вельмі зацікаўлена, каб падначаленыя прагаласавалі датэрмінова.

skrin_daterm_dziarzinsk.jpg
Паведамленне з тэлеграм-канала Nexta live

Полацк

Дырэктар прадпрыемства “Полацкводаканал” (філіял “Віцебскводаканал”) Аляксандр Фялісаў чацвёртага жніўня загадаў усім супрацоўнікам, якія знаходзіліся на працоўным месцы, ехаць на выбарчыя ўчасткі і прагаласаваць да 11.00. А майстры тэлефанавалі работнікам, якіх не было на працоўным месцы ці яны былі на выездзе, каб таксама схадзілі прагаласаваць датэрмінова.

Бяроза

З 10.00 чацвёртага жніўня на выбарчы ўчастак N12 Бярозаўскага раёну длеля таго, каб прагаласаваць, прыбылі 12 вайскоўцаў з вайсковай часткі №48684: вайскоўцы тэрміновай службы і пастаянны склад вайсковай часткі - старэйшыя лейтэнанты на чале з маёрам.

Светлагорск

Трэцяга жніўня была нарада ў рэдакцыі "Светлагорскіх навін". Галоўная рэдактарка Алена Шышкова адкрыта сказала сваім супрацоўнікам, каб галасавалі за Аляксандра Лукашэнку, бо “зараз яны маюць працу”.

У першы дзень датэрміновага галасавання на участак №22 прыйшла галасаваць патрульная рота унутраных войск. Таксама, паводле назіральніцы Алены Маслюковай, кіраўніцтва светлагорскага райпо настойліва прапаноўвала прадаўцам і іншым работнікам ісці на датэрміновае галасаванне.

Гродна

У Гродзенскім медуніверсітэце шукаюць студэнта, якога можна адправіць галасаваць датэрмінова.

skrin_daterm_grodna.jpg
Паведамленне з тэлеграм-канала "Отчислено"

Калі вы ці вашыя знаёмыя, сутыкнуліся з падобнымі праявамі - абавязкова паведамляейце пра такія факты праваабаронцам. Не забывайце прыкладаць відэа-, аўдыё- і фотасведчанні “загонаў”.

Прадстаўнікі кампаніі “Праваабаронцы за свабодныя выбары” стварылі адмысловую і зручную форму, куды можна дасылаць сведчанні прымусовага галасавання.

"Праваабаронцы за свабодныя выбары"


Каментары