Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

Шторкі знятыя для бесперапыннай цыркуляцыі паветра ў кабінах для галасавання

Назіральніца кампаніі “Праваабаронцы за свабодныя выбары” Сафія Чупрына звярнулася ў выбрачую камісію №40 Ленінскага раёна г. Магілева з заявай аб тым, што на кабінах для галасавання адсутнічаюць шторкі.

Выбарчы ўчастак №40 Ленінскага раёна г. Магілева
Кабіны для галасавання на выбарчым ўчастку №40 Ленінскага раёна г. Магілёва

У адказ старшыня камісіі Е. Шаўкунова паведаміла назіральніцы, што кабіны выкарыстоўваюцца без штор пры ўваходзе “з мэтай прадухілення распаўсюджвання рэспіраторных інфекцый (у тым ліку COVID-19), забеспячэння бесперапыннай цыркуляцыі паветра (праветрывання) у кабінах для галасавання, грунтуючыся на рэкамендацыях Міністэрства аховы здароўя па правядзенні санітарна-супрацьэпідэмічных мерапрыемстваў пры правядзенні выбараў прэзідэнта”.

storki_na_kabinah.jpg
Адказ камісіі, які атрымала Сафія Чупрына

Пры гэтам у камісіі ўпэўненыя, што такое ўладкаванне кабінак выключае кантроль за волевыяўленнем выбаршчыкаў.

Нагадаем, артыкулам 9 Выбарчага кодэксу прадугледжана:

“Галасаванне на выбарах і рэферэндуме з'яўляецца тайным: кантроль за волевыяўленнем выбаршчыкаў, удзельнікаў рэферэндуму ў ходзе галасавання забараняецца”.

Згодна з заканадаўствам, шторкі не абавязкова павінны быць, але назіральнікі неаднойчы адзначалі: на шматлікіх участках па краіне шторкі знялі або наўмысна моцна замацавалі. Пад прыкрыццём клопату аб здароўі хаваецца спроба перашкодзіць выбаршчыкам фатаграфаваць свае бюлетэні. Менавіта да фотафіксацыі галасоў заклікалі актывісты “Голасу”, каб пазбегнуць фальсіфікацый падчас выбараў.

“Адсутнасць шторак на кабінках для галасавання мы расцэньваем як недапушчальны элемент кантроля над волевыяўленнем выбаршчыкаў”

Юрыст кампаніі “Праваабаронцы за свабодныя выбары” Валянцін Стэфановіч бачыць у намеры прыбраць частку шторак на кабінках для галасавання недапушчальны элемент кантроля над волевыяўленнем выбаршчыкаў.

"Праваабаронцы за свабодныя выбары"


Каментары