Як паўплываюць на працэс галасавання рэкамендацыі медыкаў: глядзім разам
Рэкамендацыі Міністэрства аховы здароўя па прадухіленні распаўсюду COVID-19 пад час выбараў накладаюць адбітак не толькі на дзейнасць сябраў участковых выбарчых камісій, але і на паводзіны выбаршчыкаў і назіральнікаў.
Адно з пытанняў, разгледжаных на на пасяджэнні Цэнтральнай выбарчай камісіі 14 ліпеня, тычылася забеспячэння выбарчых участкаў сродкамі медыцынскай абаронцы ва ўмовах COVID-19. Старшыня ЦВК Лідзія Ярмошына паведаміла, што сродкі на такія мерапрыемствы не выдзяляліся і нават з улікам эканоміі сродкаў, можна сабраць толькі траціну ад неабходнага.
У той жа дзень Міністэрства аховы здароўя апублікавала на сваім сайце Рэкамендацыі для прадухілення распаўсюджвання рэспіраторных інфекцый (у тым ліку COVID-19) пры правядзенні галасавання. Гэтыя Рэкамендацыі ўмоўна можна падзяліць на тры групы.
Рэкамендацыі сябрам УВК
Найперш, гэта забеспячэнне наяўнасці і выкарыстанне сябрамі ўчастковых камісій сродкаў абароны: маскі, пальчаткі, па магчымасці шчыткі, дэзінфікуючыя сродкі для апрацоўкі рук і паверхняў.
Прапануецца забяспечыць наяўнасць у месцах агульнага доступу (калідоры, фае і інш.) сродкаў для дэзінфекцыі і антысептыкаў для апрацоўкі рук, апрацоўкі аўтаручак антысептыкам пасля кожнага выбаршчыка.
Па магчымасці арганізаваць падзел патокаў выбаршчыкаў, якія ўваходзяць і выходзяць з участка, размясціўшы адпаведныя ўказальнікі на падлозе, дзвярах або сценах.
Таксама неабходна будзе апрацоўваць дэзінфікуючымі сродкамі дзвярных ручак, парэнчаў, паверхняў у кабінках для галасавання, сталоў і іншых кантактных паверхняў і арганізаваць рэгулярнае праветрыванне памяшканняў (без перапынення працэсу галасавання).
Рэкамендацыі выбаршчыкам
Выбаршчыкам пад час галасавання прапануецца прад'яўляць дакумент, які пацвярджае асобу, у разгорнутым выглядзе, дэманструючы неабходныя старонкі самастойна, без перадачы ў рукі сябру ўчастковай камісіі.
Рэкамендавана пры наведванні ўчастка для галасавання знаходзіцца ў сродках індывідуальнай абароны (маска, пальчаткі), а таксама выкарыстоўваць гэтыя сродкі пры арганізацыі для іх галасавання па месцы знаходжання (дома). Пры гэтым, па просьбе сябра камісіі выбаршчык павінен часова зняць маску і паказаць свой твар, каб быць ідэнтыфікаваным.
Выбаршчыкі павінны выкарыстоўваць уласныя аўтаручкі для пастаноўкі подпісу аб атрыманні бюлетэня ў спісе грамадзян, якія маюць права ўдзельнічаць у выбарах, а таксама для запаўнення бюлетэня.
Рэкамендацыі пад час галасавання на ўчастку і на даму
Пасля завяршэння галасавання рэкамендуецца апрацаваць звонку скрыню для галасавання дэзінфікуючым сродкам, а пры арганізацыі галасавання па месцы знаходжання выбаршчыка - апрацоўваць скрыню для галасавання пасля наведвання кожнага выбаршчыка.
Галасаванне па месцы знаходжання выбаршчыка па магчымасці праводзіць без уваходу ў жылое памяшканне і з захаваннем прынцыпу сацыяльнага дыстанцыявання.
А што чакае назіральнікаў?
Найбольшую цікавасць выклікае пункт 3 прыведзеных Рэкамендацый. Ён тычыцца сацыяльнага дыстанцыянавання сябраў участковых камісій, назіральнікаў і прадстаўнікоў СМІ.
"Забяспечыць захаванне прынцыпу сацыяльнага дыстанцыявання пры расстаноўцы сталоў і крэслаў членаў участковай камісіі, месцаў для назіральнікаў, паміж выбаршчыкамі, забяспечыўшы адлегласць не менш 1 метра адзін ад аднаго."
Практыка паказвае, што сярэдняя колькасць сябраў выбарчых камісій складае 15 чалавек, а згодна з артыкулам 34 Выбарчага кодэксу у складзе участковай выбарчай камісіі можа быць ад 5 да 15 сябраў. Калі ўлічыць прысутнасць на кожным участку некалькіх назіральнікаў, прадстаўнікоў СМІ – то месца на ўчастку застаецца не так і шмат, каб рассадзіць усіх на адлегласці не меней за метр адзін ад аднаго.
У такой сітуацыі існуе верагоднасць, што не ўсім назіральнікам хопіць сацыяльна дыстанцыянаванага месца.
Нагадаем, што яшчэ да абвяшчэння выбараў прадстаўнікі кампаніі "Праваабаронцы за свабодныя выбары" прапанавалі зацікаўленым органам заканадаўчай і выканаўчай улады Беларусі распрацаваць і прыняць комплекс заканадаўчых і арганізацыйных мер, якія б забяспечылі бяспечнае ажыццяўленне ўсіх без выключэння выбарчых правоў грамадзян без іх непрапарцыйнага абмежавання ва ўмовах пандэміі. Аднак Цэнтрвыбаркам не прыслухаўся да прапаноў праваабаронцаў па правядзенні выбараў ва ўмовах пандэміі.
Выбары ва ўмовах пандэміі: Важныя прапановы праваабаронцаў