Мінгарвыбаркам парушыў тэрміны адказу на скаргу. Але абскардзіць гэта нельга
Мінская гарадская камісія па выбарах Прэзідэнта больш чым у два разы перавысіла тэрмін на прадастаўленне адказу на скаргу назіральніка кампаніі «Праваабаронцы за свабодныя выбары» Аляксея Лойкі.
З 20 па 27 чэрвеня Фрунзенская раённая у Мінску камісія па выбарах праводзіла праверку подпісаў асобаў, якія вылучаюцца ў кандыдаты ў Прэзідэнты. Старшыня камісіі Аляксандр Хіжняк забараніў прысутнічаць назіральніку пры праверцы подпісаў. Па выніках праверкі ўсе подпісы, здадзеныя ў падтрымку Віктара Бабарыкі (47 190) і Валерыя Цапкала (17 853), былі прызнаныя камісіяй несапраўднымі.
Аляксей Лойка абскардзіў у Мінгарвыбаркам нядопуск да праверкі подпісаў. 25 чэрвеня скарга была ўручана вышэйстаячай камісіі.
2 ліпеня Мінгарвыбаркам паведаміў назіральніку, што "прававых падстаў аб правядзенні праверкі і прызнанні забароны на прысутнасць пры праверцы подпісаў незаконнай, не маецца". Таксама камісія ўпэўненая, што назіральнік мае права толькі на тыя дзеянні, якія вызначаны артыкулам 13 Выбарчага кодэкса. Мінгарвыбаркам таксама падкрэсліў у адказе, што пазіцыя назіральніка ў дачыненні да працы Фрунзенскай выбарчай камісіі адлюстроўвае яго асабістае меркаванне. Здавалася бы — звычайная адпіска, толькі пры яе падрыхтоўцы камісія больш чым у два разы перавысіла прадугледжаны заканадаўствам тэрмін на прадастаўленне адказу.
Назіральнік кампаніі "Праваабаронцы за свабодныя выбары" Аляксей Лойка распавядае, што з моманту ўручэння скаргі да прадастаўлення адказу прайшло 7 дзён. Дзеянні Менгарвыбаркама парушаюць палажэнні ч. 3 арт. 49-1 Выбарчага кодэкса, згодна з якім звароты аб парушэнні заканадаўства Рэспублікі Беларусь аб выбарах, якія паступілі ў камісіі, дзяржаўныя органы і арганізацыі, разглядаюцца ў трохдзённы тэрмін з дня паступлення звароту. Звароты, у якіх утрымліваюцца звесткі, якія патрабуюць праверкі, разглядаюцца не пазней чым у дзесяцідзённы тэрмін са дня паступлення.
Аляксей Лойка звярнуўся з гэтай нагоды ў Цэнтрвыбаркам, дзе яму адказалі, што Мінгарвыбаркам павінен даваць адказ на працягу тэрміну, які прадугледжаны для зваротаў грамадзян і юрыдычных асоб. Больш таго, яму паведамілі, што правоў у назіральніка на абскарджанне парушэнні тэрмінаў на прадастаўленне адказу няма.