Збор подпісаў у Маладзечне сканчваецца з размахам
Як распавядае назіральнік кампаніі "Праваабаронцы за свабодныя выбары" Эдуард Баланчук, 17 чэрвеня ў Маладзечне адбыўся масавы збор подпісаў за вылучэнне альтэрнатыўных кандыдатаў. Назіральнік адзначае, што такая актыўнасць раней у горадзе не была заўважана.
- Сустрэча Валерыя Цэпкалы ў Маладзечне 17 чэрвеня. Фота: Эдуард Баланчук
"Адметна тут тое, што пікеты за альтэрнатыўных кандыдатаў праходзілі амаль што па ўсім горадзе. Так, каля мясцовага кінатэатра "Радзіма" збіралі подпісы адразу за чатырох прэтэндэнтаў: Валерыя Цэпкалу, Віктара Бабарыку, Святлану Ціханоўскую і Мікалая Казлова", – распавёў назіральнік.
- Збор подпісаў у Маладзечне 17 чэрвеня. Фота: Эдуард Баланчук
У Маладзечна таксама прыязджаў на сустрэчу вылучэнец Валерый Цэпкала, на якой прысутнічала каля 100 чалавек адначасова.
"Сустрэча з Валерыем Цэпкалай праходзіла спакойна, без правакацый, на пазітыве. "Ціхароў" не было заўважана, был толькі адзін міліцыянт у цывільным адзенні, мой знаёмы. На пытанне, ці па службе ён прыстунічае на пікеце, адказаў, што проста цікавацца", – кажа Эдуард Баланчук.
Каля пікета Святланы Ціханоўскай луналі сцягі партый БНФ і АГП.
- Маладзечна 17 чэрвеня. Фота: Эдуард Баланчук
